മുഖ്യപരിശീലകന്‍ ഗൗതം ഗംഭീറിന്റെ ടീം ഘടനയിലെ വലിയൊരു പോരായ്മ ചൂണ്ടിക്കാണിച്ചുകൊണ്ട് ഇന്ത്യന്‍ ക്രിക്കറ്റ് ഇതിഹാസം സുനില്‍ ഗവാസ്‌കര്‍ തന്റെ വിയോജിപ്പ് തുറന്നുപറഞ്ഞു. ബഹുമുഖ കഴിവുകളുള്ള കളിക്കാരോടുള്ള ഗംഭീറിന്റെ താല്പര്യം പരസ്യമായ ഒന്നാണ്. എന്നാല്‍ ബാറ്റിംഗ് ലൈനപ്പിന്റെ നീളം കൂട്ടാനുള്ള മാനേജ്മെന്റിന്റെ ശ്രമം ടീമിന്റെ സന്തുലിതാവസ്ഥയെ ബാധിക്കുന്നുണ്ടെന്നും തോല്‍ക്കാന്‍ പാടില്ലാത്ത മത്സരങ്ങളില്‍ പോലും തോല്‍ക്കാന്‍ ഇത് കാരണമാകുന്നുണ്ടെന്നും ഗവാസ്‌കര്‍ ചൂണ്ടിക്കാട്ടി.
ടീമിന് നാല് പ്രധാന ബൗളര്‍മാരും രണ്ട് ഓള്‍റൗണ്ടര്‍മാരുമാണ് വേണ്ടതെന്നും, എട്ടാം നമ്പര്‍ വരെ ബാറ്റിംഗ് നീട്ടുന്നതില്‍ ഒരു അര്‍ത്ഥവുമില്ലെന്നും അദ്ദേഹം പറഞ്ഞു. 'നമുക്ക് ബൗളിംഗ് കാണാന്‍ സാധിച്ചില്ല. ഈ ഒമ്പത് ഓവര്‍ മത്സരത്തില്‍ ഇന്ത്യക്കാര്‍ എങ്ങനെ പന്തെറിയുന്നു എന്ന് കാണുന്നത് രസകരമായിരുന്നു. ഈ പരമ്പരയില്‍ നിന്ന് മനസ്സിലാക്കേണ്ട പ്രധാന കാര്യം, ബൗളിംഗില്‍ കുറഞ്ഞത് നാല് പ്രധാന ബൗളര്‍മാരെയെങ്കിലും കളിപ്പിക്കണം എന്നതാണ്. അഞ്ചാമത്തെയും ആറാമത്തെയും ബൗളര്‍മാര്‍ നിങ്ങളുടെ ഓള്‍റൗണ്ടര്‍മാരാകാം, അതായത് ബാറ്റ് ചെയ്യാനും കഴിയുന്ന ആളുകള്‍. പ്രധാനമായും ബാറ്ററായ, എന്നാല്‍ രണ്ടോ മൂന്നോ ഓവറുകള്‍ എറിയാന്‍ കഴിയുന്ന നമന്‍ ധീറിനെപ്പോലെയോ, അല്ലെങ്കില്‍ നാല് ഓവറുകള്‍ പൂര്‍ണ്ണമായി എറിയാന്‍ കഴിയുന്ന അക്‌സര്‍ പട്ടേലിനെപ്പോലെയോ ഉള്ള കളിക്കാര്‍' -ഗവാസ്‌കര്‍ പറഞ്ഞു.
ഹാര്‍ദിക് പാണ്ഡ്യക്ക് പകരം മറ്റൊരു കളിക്കാരനെ കണ്ടെത്താന്‍ ശ്രമിക്കുന്നതില്‍ മാനേജ്മെന്റ് അമിതമായി ശ്രദ്ധ നല്‍കുന്നുണ്ടെന്നും ഗവാസ്‌കര്‍ ചൂണ്ടിക്കാട്ടി. ബാറ്റിംഗിലും ബൗളിംഗിലും ഒരുപോലെ തിളങ്ങാന്‍ കഴിയുന്ന ഹാര്‍ദിക് പാണ്ഡ്യക്ക് പകരക്കാരനെ കണ്ടെത്തുക അസാധ്യമാണെന്നും അദ്ദേഹം വ്യക്തമാക്കി. 'ഹാര്‍ദിക് പാണ്ഡ്യക്ക് ഒരു പകരക്കാരനെ കണ്ടെത്താനുള്ള ശ്രമത്തില്‍ നമ്മള്‍ ചിലപ്പോഴൊക്കെ അല്പം വഴിതെറ്റിപ്പോകുന്നുണ്ട്. ഹാര്‍ദിക് പാണ്ഡ്യക്ക് പകരം വെക്കാന്‍ മറ്റൊരു കളിക്കാരനില്ല. അദ്ദേഹത്തിന്റെ നിലവാരമുള്ള ഒരാളെ കണ്ടെത്താന്‍ സാധിക്കുന്നില്ലെങ്കില്‍, അല്പം വ്യത്യസ്തമായ ജോലി ചെയ്യാന്‍ കഴിയുന്ന ഒരാളുമായി മുന്നോട്ട് പോകുക. നമന്‍ ധീര്‍ ആ ജോലിയാണ് ചെയ്യുന്നത്. അവന്‍ തന്റെ ഓവറുകള്‍ നന്നായി എറിയുന്നുണ്ട്, കൂടാതെ ഈ മത്സരത്തില്‍ അവന്‍ ബാറ്റ് ചെയ്ത രീതിയും നോക്കൂ. അതിനാല്‍, ഇന്ത്യ ചെയ്യേണ്ടത് ഇതാണെന്നാണ് ഞാന്‍ കരുതുന്നത്. കാരണം എട്ടാം നമ്പര്‍ വരെ ബാറ്റിംഗ് നീട്ടുമ്പോള്‍, അത് നിങ്ങളുടെ ബൗളിംഗിന്റെ ശക്തി കുറയ്ക്കുകയാണ് ചെയ്യുന്നത്, അവിടെയാണ് നിങ്ങള്‍ തോല്‍ക്കുന്നത്' -ഇന്ത്യന്‍ ക്രിക്കറ്റ് ഇതിഹാസം വ്യക്തമാക്കി.
ചര്‍ച്ചയില്‍ പങ്കെടുത്ത് സംസാരിച്ച മുന്‍ ഇന്ത്യന്‍ താരം ചേതേശ്വര്‍ പൂജാരയും ഇന്ത്യയുടെ ബൗളിംഗ് നിരയെക്കുറിച്ച് ചില കാര്യങ്ങള്‍ പങ്കുവെച്ചു. ഭാവിയിലേക്കുള്ള സ്പിന്‍ കോമ്പിനേഷന്‍ കൃത്യമായി തിരിച്ചറിയേണ്ടതിന്റെ പ്രാധാന്യം അദ്ദേഹം എടുത്തുപറഞ്ഞു. 'നിങ്ങള്‍ കളിക്കാരെ കണ്ടെത്തി അവരെ പിന്തുണച്ചുകൊണ്ടേയിരിക്കണം. ബൗണ്ടറിയുടെ വലിപ്പം ചെറുതാണെങ്കില്‍ കുല്‍ദീപ് എല്ലാ മത്സരങ്ങളിലും കളിച്ചേക്കില്ല. അതിനാല്‍ അവര്‍ ഇന്ത്യന്‍ ടീമിന്റെ ഭാഗമായി തുടരുമെന്ന വ്യക്തത കളിക്കാര്‍ക്ക് നല്‍കേണ്ടതുണ്ട്. അവര്‍ എല്ലായ്‌പ്പോഴും പ്ലേയിംഗ് ഇലവനില്‍ ഉണ്ടായിരിക്കണമെന്നില്ല, പക്ഷേ അവര്‍ വലിയൊരു ടീം ഘടനയുടെ ഭാഗമാണ്. ഈ സന്ദേശം പ്രത്യേകിച്ച് സ്പിന്നര്‍മാരിലേക്ക് എത്തിക്കേണ്ടതുണ്ട്, കാരണം കുറഞ്ഞ ഫോര്‍മാറ്റുകളില്‍ അവര്‍ക്ക് ആത്മവിശ്വാസം വളരെ വേഗത്തില്‍ നഷ്ടപ്പെടാം. നാല് ഓവര്‍ സ്‌പെല്ലില്‍ 40 മുതല്‍ 50 വരെ റണ്‍സ് വഴങ്ങിയാല്‍ നിങ്ങള്‍ക്ക് ആത്മവിശ്വാസം നഷ്ടപ്പെടാന്‍ തുടങ്ങും, മുന്‍കാലങ്ങളില്‍ കുല്‍ദീപിന് അങ്ങനെ സംഭവിച്ചിട്ടുണ്ട്. അതിനാല്‍, വരുണിന് ശേഷം നിങ്ങളുടെ പ്രധാന സ്പിന്നര്‍മാര്‍ ആരാണെന്ന് തിരിച്ചറിയേണ്ടത് പ്രധാനമാണ്, അത് കുല്‍ദീപ ആണോ അതോ രവി ബിഷ്ണോയി ആണോ എന്നത്. ബിഷ്ണോയ് ഇപ്പോള്‍ അത്ര നന്നായി പന്തെറിയുന്നില്ല, അതിനാല്‍ നമ്മള്‍ മറ്റൊരു വഴി നോക്കേണ്ടി വന്നേക്കാം. അടുത്ത രണ്ടുമൂന്ന് വര്‍ഷങ്ങളില്‍ ടീമില്‍ കാണാന്‍ ആഗ്രഹിക്കുന്നത് ആരെയൊക്കെയാണെന്ന് തിരിച്ചറിയുകയും അവര്‍ക്ക് ആവശ്യത്തിന് അവസരങ്ങള്‍ നല്‍കാന്‍ ശ്രമിക്കുകയും ചെയ്യേണ്ടത് വളരെ പ്രധാനമാണ്' -പൂജാര പറഞ്ഞു.
content highlights: 'That's Where You Lose': Sunil Gavaskar Slams BCCI Team Selection Strategy